சுயமரியாதை கொண்ட நிர்வாகம் வேண்டும்!!!!

இன்று(04/11/2011) நடந்து முடிந்த ஜும்மா தொழுகைக்கு பின் நமதூர் முத்தவல்லி ஒரு அறிவிப்பை வெளியிட்டுள்ளார். அதில் நீடூரில் கோரஸ் வாக்கெடுப்பு என்பது பாரம்பரியமிக்கது, அதை மாற்றி ரகசிய வாக்கெடுப்பெல்லாம் நடத்த முடியாது என்றுள்ளார். இது போல் இவரால் தன்னிச்சையாக முடிவெடுத்து சொல்ல அதிகாரம் தந்தது யார்? எதாவது பிரச்சனை என்றால் மக்களின் பெருபான்மையை பார்த்தே முடிவெடுக்க வேண்டும். மக்களுக்கு பணியாற்றவே இவர்களை நாம் ஒரு பிரதிநிதிகளாக தேர்தெடுத்துள்ளோமே தவிர இவர்கள் தான் நீடூரின் மொத்த உருவம் என அவர்களே நினைத்து கொள்ளக் கூடாது. நீடூர்-நெய்வாசல் நிர்வாகிகள் தேர்தலை ரகசிய வாக்கெடுப்பு மூலம் நடத்த வலியுறுத்தி தஞ்சை வக்பு வாரிய தலைவருக்கு எத்தனை SMS-கள் மக்கள் அனுப்பியிருக்கிறார்கள் என்று இந்த நிர்வாகிகளுக்கு தெரியுமா?. மக்கள் இந்த நிர்வாகத்திடம் எதை சொன்னாலும் செவிடன் காதில் ஊதிய சங்கை போல் எதுவும் நடக்காது என தெரிந்தே தேர்தலை நடத்தும் வக்பு வாரியத்திடம் SMS மூலமாக தங்கள் கோரிக்கைகளை தெரிவித்துள்ளனர். இதன் மூலம் மக்களுக்கு இந்த நிர்வாகத்திடம் உள்ள
அதிருப்தியை வெளிபடுத்தியுள்ளனர்.
கோரஸ் முறை என்றால் வெளிப்படையாக மக்கள் இந்த பெரியவர்கள் என்று சொல்லி கொள்பவர்களை எதிர்த்து கைத்தூக்க பயப்படுவார்கள். அதற்காக தானே ரகசிய வாக்கெடுப்பு மூலமாவது நம் மக்கள் தங்களது வீரத்தை வெளிபடுத்துவார்கள் என்று தானே இந்த முறையை அனைவரும் வலியுறுத்துகின்றனர். மூன்றாண்டிற்கு முன் கையொப்பம் இட்டு தேர்தல் நடத்தினார்களே அப்போழுது இவர்கள் பாரம்பரியம் எங்கே போனது? அந்த தேர்தலில் கிடைத்த தோல்வியின் காரணமாகவே இவர்கள் ரகசிய வாக்கெடுப்பு நடத்த பயப்படுகின்றனர். மக்கள் இவர்களை எதிர்ப்பது இவர்களுக்கே தெரிந்தும் ஏன் தான் இந்த பதவியில் ஒட்டிக் கொண்டு பதவி விலக மறுக்கிறார்களோ? இவர்களை மக்கள் எப்படியெல்லாம் பேசுகிறார்கள் என்று இவர்களுக்கு தெரியுமா? தெரிந்து தான் இந்த பதவியில் இருக்கின்றேன் என்று இவர்கள் கூறுவார்களானால் இவர்களை நாம் என்ன செய்வது? சுயமரியாதை எவ்வளவு முக்கியம் என்று இஸ்லாம் கூறுவதை இவர்கள் ஏற்கவில்லையா? இவ்வளவு கேள்விகளும் மக்களின் கேள்விகள்? அவர்களின் ஆதங்கத்தின் வெளிபாடுகள். மக்களும் இந்த கோரஸ் முறைக்கு ஒருபோதும் ஒத்துக்கொள்ளக்கூடாது. அதற்கு மாறாக இந்த கோரஸ் முறைக்கு ஒத்துக்கொண்டால் இவர்களை தவிர வேறு யாரும் பதவிக்கு வர முடியாது. திரும்ப இவர்கள் வந்தபின் அது சரியில்லை, இது சரியில்லை என மக்கள் புலம்பாமல் அதற்கு முன்பே தடுத்து நிறுத்துவது எல்லாருக்கும் நல்லது. இன்ஷா அல்லாஹ் நம் மேல் அக்கறை கொண்ட, ஊர் நலனை மேல்படுத்த திறமை கொண்ட, எதற்கெடுத்தாலும் வசூல் என்று குடும்பத்தை பிரிந்து குறைந்த ஊதியத்தில் வெளிநாடுகளில் சம்பாதிப்பவர்களிடம் கட்டாய வசூல் செய்யாமல் ஊரிலேயே ஜமாத்திற்கு தேவையான வருமானத்தை உண்டாக்கிக் கொள்ள திறமை படைத்த ஜமாத் வருவதற்கு எல்லாம் வல்ல இறைவனை பிராத்திப்போமாக.